Ոստիկանության Լոռու մարզային վարչության աշխատակիցների ձեռնարկած
օպերատիվ-հետախուզական եւ քննչական գործողությունների արդյունքում մի քանի
ժամ առաջ սպանություն կատարելու կասկածանքով ձերբակալվել է Տիգրան Մեծի 54
շենքի բնակիչ, «Գիվի» մականվամբ, նախկինում 10 անգամ դատապարտված 51-ամյա
Գեւորգ Սեյրանի Միրաքյանը:
Ինչպես NEWS.am-ին Վանաձորից հայտնեց
ֆոտոլրագրող Գագիկ Շամշյանը, այս պահին ոստիկանության Լոռու մարզային
վարչության եւ Վանաձորի բաժնի աշխատակիցները Լոռու մարզի քննչական բաժնի
քննիչների հետ դեպքի վայրում փորձարարական աշխատանքներ են կատարում:
Մասնավորապես, Միրաքյանը քննչական խմբին մատնացույց է անում այն վայրը,
որտեղ գցել է սպանվածի դին: Սպանվածը նախկինում 11 անգամ դատապարտված,
Վանաձոր քաղաքի Հալաբյան փողոցի 1-ին շենքի 1 բնակարանի բնակիչ, «Մշկո»
մականվամբ 70-ամյա Միշա Կիրակոսյանն է:
Օպերատիվ-քննչական խումբը պարզել է, որ գիշերը Տիգրան Մեծ փողոցի
բնակարանում երկուսը միասին կերուխում են արել եւ կենցաղային հարցերի շուրջ
ծագած վիճաբանության ժամանակ Գիվին սպանվածի ձեռնափայտով մի քանի անգամ
հարվածել է Կիրակոսյանի գլխին եւ մարմնի տարբեր մասերին: Այնուհետեւ, երբ
տեսել է, որ նա մահացել է, դիակը դուրս է հանել բնակարանից եւ թողել
բակում:
Ոստիկանության քննչական գլխավոր վարչության Լոռու մարզի քննչական
բաժնում հարուցվել է քրեական գործ ՀՀ քր.օր.-ի 104 հոդվածի 1-ին մասի
հատկանիշներով (Սպանություն, ապօրինաբար մեկ ուրիշին դիտավորությամբ
կյանքից զրկելը):
Դեպքի վայրում է Լոռու մարզային վարչության պետ, գնդապետ Անուբախ
Համբարյանը, Վանաձորի բաժնի պետ Սերգո Ավետիսյանը, Լոռու քննչական բաժնի
պետ Գագիկ Իսպիրյանը, փորձագետն ու քննչական խումբը: Սպանություն կատարողը
ձերբակալվել է եւ դեպքի վայրի փորձարարական աշխատանքներից հետո
տեղափոխվելու է Վանաձորի ձերբակալվածների պահման վայր (ՁՊՎ):