 Վանաձոր
քաղաքի ճանապարհները վարորդների համար լուրջ գլխացավ են դարձել։ Թեպետ
ամեն տարի քաղաքապետարանի կողմից բավականին մեծ գումարներ են հատկացվում
դրանք բարեկարգելու համար, սակայն այդուհանդերձ, այս հարցը քաղաքում
շարունակում է մնալ օրակարգային։
Վանաձորում վերջին տարիներին
փողոցների ամբողջական ասֆալտապատում չի կատարվել, իսկ եթե նույնիսկ արվել
է, ապա միայն մի քանի փողոցներում, այն էլ՝ մասնակի։ Մնացած փողոցներում
կատարվում են փոսային նորոգման աշխատանքներ, այլ կերպ ասած`կարկատում են։
Իսկ փողոցների քարուքանդ վիճակում իր ուրույն ձեռագիրն ունի Լոռի ջրմուղ
կոյուղի ՓԲԸ-ն, որը ջրի խողովակների վթարները վերացնելու պատճառով քանդում է
ճանապարհը և մոռանում այն գոնե նախկին տեսքին բերելու մասին։
Վանաձորի
Բազում թաղամաս տանող Շինարարների փողոցով են երթևեկում քաղաքային
տրանսպորտի շուրջ 80 տոկոսը։ Չնայած դրան, Շինարարների փողոցն այսօր դարձել
է գրեթե անանցանելի. "Մեկ ամիս առաջ ջրմուղն եկավ քանդեց, իրանց ջրի վթարը
վերացրեց ու թողեց գնաց, սաղ ճամփեն քանդված ա, ոչ ոտով ենք կարում
անցնենք, ոչ էլ տրանսպորտով, խեղճ շոֆերները կրակն են ընկել, օրը մի մաս են
փոխում”,- մեզ հետ զրույցում դժգոհեց 40-ամյա Աշոտը։
Բնակիչները
ևս հաստատեցին քաղաքացու ասածը, ավելացնելով, որ բազմիցս դիմել են ինչպես
Լոռի ջրմուղ կոյուղի ՓԲԸ-ին, այնպես էլ Վանաձորի քաղաքապետարանին, սակայն
հարցին լուծում չի տրվել։ Երթուղային տաքսիների վարորդներն էլ տեսնելով, որ
լուսանկարում ենք անանցանելի դարձած ճանապարհները, հույսները կորցրած
հայտնեցին, որ դժվար թե որևէ բան փոխվի, քանի որ խնդրին բոլորն էլ տեղյակ
են։
Քանդված ճանապարհից զանգահարեցինք ԼՋ պետ Էդվարդ Վահանյանին,
պարզելու, թե ինչն է եղել ճանապարհը քանդելու և այն չբարեկարգելու պատճառը:
Պարզվեց` "անբարենպաստ եղանակն էր ու առատ ձյունը”, հետո պարոն Վահանյանը
երբ իմացավ, որ խոսքը վերաբերում է Շինարարների փողոցին, միանգամից
պատասխանեց. "Այդ փողոցը էսօր առավոտ շիբին են լցրել, սաղ դզած ա, սարքել
են, պրոբլեմ չկա էդտեղ, գնացեք ինքներդ նայեք”։ Սակայն երբ Պարոն
Վահանյանին տեղեկացրեցինք, որ մենք փողոցում ենք և որևէ բարեկարգման հետք
անգամ չկա, խոստացավ անմիջապես պարզել։ Մոտ երկու րոպե անց արդեն հայտնվեց
խճաքարով պատված բեռնատարը հարթեցնող տեխնիկայի հետ, որն էլ փոսերը
հարթեցրեց և հեռացավ։
Սակայն հետաքրքիրն այն էր, որ ԼՋ պետը մեկ
ամիս շարունակ անտեսել էր բնակիչների և վարորդների բողոքը, խնդրի լուծումը
դանդաղացնելով, այդ ամենի պատճառը տեսնելով ձյան մեջ, իսկ երբ նրան
զանգահարեցինք և ներկայացանք, ապա նույն պահին աշխատանքը կատարվեց։
Վանաձորում
նմանօրինակ բազմաթիվ փողոցներ կան։ Վանաձորի քաղաքապետարանի կոմունալ
տնտեսության և բարեկարգման բաժնի պետ Լյովա Մելիքյանն ասում է, որ այդ
նպատակով համայնքային բյուջեից հատկացվել է 90 մլն դրամ գումար, որը պետք է
ծախսվի շուրջ 40 փողոցի համար, սակայն մասնակի։ Այսինքն, այս տարի ևս,
Վանաձորի ճանապարհները կարկատան կարվեն՝ պահպանելով հին ու բարի
ավանդույթները՝ "Փոսային ու միայն փոսային”։ Իսկ ճանապարհներում առկա
ասֆալտի նմանօրինակ քայքայվածության պատճառն, ըստ Մելիքյանի՝ "Շատ ձյունն
էր ու աղը”։
ԷԴՎԱՐԴ ԱՐԶՈՒՄԱՆՅԱՆ
Վանաձոր, Հանրային թղթակից ծրագրի շրջանակներում
Հոդվածը՝ www.lragir.am-ի
|
