Պաշտպանության նախարար Սեյրան Օհանյանն Ազգային ժողովում պատգամավոր Վիկտոր Դալլաքյանի խնդրանքով անդրադարձել է օրերս ԼՂ զորամասերից մեկում տեղի ունեցած միջադեպին, որի հետևանքով մահացել է ժամկետային զինծառայող Գևորգ Կոտինյանը: «Պետք է ասեմ, որ դեպքը տեղի է ունեցել ԼՂ հարավարևելյան հատվածում տեղակայված զորամասերից մեկում: Միջանձնային հարաբերությունների խախտման արդյունքում, վիճաբանության և այնուհետև ծեծկռտուքի արդյունքում է տեղի ունեցել այդ մահը, որը նաև դիահերձման արդյունքում ապացուցվել է: Հարուցված է քրեական գործ, և միանգամից բացահայտվել են այն երեք անձինք, որոնք կատարել են հանցագործությունը»,- մանրամասները ներկայացրեց Սեյրան Օհանյանը: Պաշտպանության նախարարը խոստացավ, որ քրեական գործի քննության արդյունքում մեղավորները կպատժվեն։ Պաշտպանության նախարարը նշեց, որ բանակում տեղի ունեցած յուրաքանչյուր արտակարգ պատահարի ժամանակ իրենք նշանակում են հրամանատարական, ծառայողական քննություններ, բացի դրանից` իրավապահ մարմիններն անմիջապես սկսում են իրենց գործողություններ: «Չի եղել որևիցե մի դեպք, չի եղել որևիցե մի պատահար, որին մենք չարձագանքենք և համապատասխան որոշումներ չընդունենք` սկսած բացահայտումով և վերջացրած նաև պատժի և տույժերի կիրառմամբ և այդ ամենը փորձում ենք ներկայացնել հանրությանը: Չպետք է թերհավատ լինեք, պաշտպանության նախարարը և նրա ամբողջ համակարգն ամբողջությամբ բաց է լինելու ժողովրդի առջև»,- ասաց Սեյրան Օհանյանը:
|