Գլխավոր » 2011»Հոկտեմբեր»31 » Վանաձորի քաղաքապետարանի աշխատակիցներ պետք է մրսեն. քաղաքապետ
23:58
Վանաձորի քաղաքապետարանի աշխատակիցներ պետք է մրսեն. քաղաքապետ
Հոկտեմբեր 31, 2011 | 18:23 Վանաձորի քաղաքապետարանն այս տարի որոշել է ջեռուցել միայն իր վարչական շենքը, այլ ոչ թե հարակից շենքերն էլ հետը: Այս մասին նշվել է այսօր` հոկտեմբերի 31-ին, Լոռիի մարզկենտրոն Վանաձորի քաղաքապետարանի բաժինների պետերի ներկայությամբ ամենշաբաթյա հերթական նիստի ժամանակ:
Նիստի ընթացքում քաղաքապետ Սամվել Դարբինյանն իր խոսքում շեշտել է, որ այս տարի ամեն տարվա նման չի լինելու, քանի որ նախորդ տարիներին իրենք գումար էին վճարում, ջեռուցում քաղաքապետարանի շենքը, միաժամանակ նաեւ «տաքացնելով» հարակից բնակելի շենքերի բնակիչներին ու տաք ջուր մատակարարելով նրանց: Քաղաքապետի խոսքով, դեռ 15-20 օր առաջ էր ինքը հանձնարարել ջեռուցման համակարգին ուշադրություն դարձնելու համար, բայց մինչ օրս շենքը չի տաքացվում:
Նրա բարկությանն ի պատասխան բաժնի պետերից մի քանիսն ասել են, որ այսօր էլ հնարավոր է միացնել ջեռուցումը, սակայն սպասվածին հակառակ` այս պատասխանից քաղաքապետի զայրույթն ավելի է բորբոքվել. «Հա, բա ո՞նց, կարող ենք էսօր էլ միացնել, կարող ենք տրաքացնել, տաքն ու սառը իրարից չջոկել, ու կողքուբոլորի շենքերին էլ տաք ջուր տալ: Գնացեք, բոլոր հարցերը կարգավորեք, նոր կմիացնեք: Իմացեք, որ այս տարի ուրիշ է լինելու, մեր ջեռուցումից մեզնից բացի էլ ոչ ոք չի օգտվելու»,- ասել է նա ու նաեւ հետաքրքրվել, թե ջեռուցման համակարգի խնդիրները կարգավորելու համար, որքա՞ն հավելյալ ժամանակ է պահանջվում: Որպես հավելյալ ժամկետ, պետերը նշել են 1 շաբաթը, Սամվել Դարբինյանն էլ եզրափակել է. «Լավ, մի շաբաթ էլ կմրսենք, տեսնենք կկարգավորվի թե չէ»:
Հոկտեմբեր 31, 2011 | 18:23 
