ՀԱՕԿ-ի նախագահ Գագիկ Ծառուկյանի անվան միջազգային մրցաշարում ամենատիտղոսակիր մասնակիցներից էր Հրաչյա Ջավախյանը: Պեկինի օլիմպիական խաղերի բրոնզե մեդալակիրը և Եվրոպայի գործող  չեմպիոնը մրցաշարում անցկացրեց ընդամենը 2 մրցամարտ, սակայն դա էլ բավական էր, որ նա ոչ միայն  64 կգ քաշային կարգում նվաճեր հաղթողի կոչումը, այլ ճանաչվեր  նաև մրցաշարի լավագույն բռնցքամարտիկի  համար սահմանված  հատուկ մրցանակին:

Իր առաջին մարտում Ջավախյանը նկատելի առավելություն ուներ  վրացահայ Ներսես Անտոնյանի նկատմամբ և 3-րդ ռաունդում հասավ հաղթանակի: 2-րդ մրցամարտում Հրաչյայի մրցակիցը ռուսաստանցի  Արմեն Զաքարյանն էր: Այստեղ էլ նկատելի էր Ջավախյանի առավելությունը, և նա մրցակցին գերազանցեց  24-10 հաշվով: Այս քաշային կարգի եզրափակչից առաջ, ինչպես պահանջվում է, Ջավախյանը մտավ ռինգ, սակայն նրա մրցակիցը' Զլադեկ Զդենեկը, ադպես էլ չներկայացավ մարտին: Քիչ անց հայտարարվեց, որ  64 կգ-ում մրցակցի չներկայանալու պատճառով հաղթող է ճանաչվում Հրաչյա Ջավախյանը: ArmSport.am-ը մի քանի հարց ուղղեց վանաձորցի մարզիկին:

-Հրաչյա, շնորհավորում ենք հաղթողի կոչման կամար: Հանդիսականների համար անակնկալ էր, որ մրցակիցը ռինգ չմտավ, ինքդ էլ միայն ա՞յդ ժամանակ տեղեկացար, որ մարտը չի կայանալու:

-Շնորհակալություն շնորավորանքի համար: Ես դեռևս առավոտյան գիտեի, որ մրցամարս չի կայանալու:  Երբ անցկացվում էր բռնցքամարտիկների կշռման արարողությունը, ինձ ասացին, որ չեխ բռնցքամարտիկը վատառողջ է, և մարտը չի կայանալու: Իհարկե, դա ցավալի է, քանի որ տրամադրված էի  հաղթողի կոչումը նվաճել ավելի համոզիչ ձևով: Առավել ևս, որ  մեծ թվով երկրպագուներ էին ներկա և ցանկանում էի իմ հայրենակիցներին  գեղեցիկ մարտի ականատեսը դարձնել:

-Քո մարզական կյանքում կարծես նմանատիպ այլ դեպք էլ եղել է, երբ մրցակիցը ռինգ չի մտել...

-Պեկինի օլիմպիական խաղերում քառորդ եզրափակչում ես պետք է հանդիպեի հարավկորեացի Պեկ Սոպի հետ, սակայն վերջինս առողջական խնդիրների պատճառով հրաժարվեց մարտից, և ես ստացա կիսաեզրափակչի ուղեգիր:

- Այժմ քո ձեռքին է պարգևավճարով ծրարը, որում 5 հազար դոլար է: Արդեն որոշել ես, թե ի՞նչ նպատակի ես  ծառայեցնելու  գումարը:

-Գումարն այնքան էլ շատ չէ, եթե ասեմ դրա ծախսման նպատակը: Պետք է ինձ համար բնակարան  գնեմ, քանի որ այժմ դրա  անհրաժեշտությունն առաջնայինն է: Հարցն այն է, որ մի բնակարանում  բնակվում ենք  2 եղբայրներով, նաև մեզ հետ են քույրս և մայրս:

-Ամուսնացա՞ծ ես:

- Այո, ունեմ դուստր, ով 8 ամսական է: Եղբայրս նույնպես ունի իր ընտանիքր, և ինչպես ես' մեկ աղջնակ: Իհարկե, այս գումարը բավարար չէ բնակարան գնելու համար, սակայն  շնորհիվ Գագիկ Ծառուկյանի սահմանած բարձր պարգևավճարի, այն նկատելորեն կնպաստի, որ մենք կարողանանք հասնել մեր նպատակին:

-Ինչպիսի՞ն են, առաջիկա ծրագրերդ:

-Այս մրցաշարը  Եվրոպայի և աշխարհի առաջնություններից առաջ նախապատրաստական փուլերից մեկն էր: Շարունակելու եմ նախապատրաստվել այդ առաջնություններին, որպեսզի հնարավորինս հաջող հանդես գամ այդ մրցումներում: Հավանաբար, մինչև Եվրոպայի առաջնությունը, որը կայանալու է հունիսին' Թուրքիայում, որևէ այլ մրցաշարի չմասնակցեմ:

-Եվրոպայի առաջնությունից հետո կայանալու է աշխարհի առաջնությունը, որն անցկացվելու է Բաքվում: Պատրա՞ստ ես մեկնելու այդ առաջնությանը, և մեկնելու դեպքում  ի՞նչ արդյունքներ կարելի է ակնկալել:

-Առանց երկմտելու կմեկնեմ աշխարհի առաջնությանը: Կարծում եմ' հավաքականի մյուս անդամներն էլ նման տրամադրվածություն ունեն: Սակայն մինչ այդ, ադրբեջանական կողմը համապատասխան երաշխիքներ պետք է տրամադրի: Իհարկե, շատ գործոններ մեր դեմ կլինեն, որպեսզի հասնենք բարձր արդյունքների: Սակայն ամեն դեպքում, մենք պետք է  ամեն ինչ անենք, որպեսզի Բաքվում մեդալներ նվաճենք, և մեր դրոշն էլ, ի նշան հաղթանակի, բարձրացվի այդ երկրի մայրաքաղաքում:

Լուսանկարը՝ asbarez.com-ի

Հոդվածը՝ armsport.am-ի