Գլխավոր » 2011»Սեպտեմբեր»1 » ՀՀ վարչապետը մասնակցեց Վանաձորի թիվ 22 դպրոցի բացման արարողությանը
18:22
ՀՀ վարչապետը մասնակցեց Վանաձորի թիվ 22 դպրոցի բացման արարողությանը
16:47, 31 Օգոստոս, 2011
ՎԱՆԱՁՈՐ, 31 ՕԳՈՍՏՈՍԻ, ԱՐՄԵՆՊՐԵՍ: Այսօր տոնական տրամադրություն էր Վանաձորի Ստեփան Զորյանի անվան թիվ 22 դպրոցի բակում. գիտելիքի, գրի եւ դպրության օրվան ընդառաջ' հանդիսավոր կերպով բացվեց «Լինսի» հիմնադրամի աջակցությամբ հիմնանորոգված դպրոցի շենքը: Հիմնադրամի կողմից հատկացված 467 մլն դրամով, «Ուկրշին» շինկազմակերպության շինարարների ջանքերով 192 աշակերտ ունեցող դպրոցի համար մարզական եւ հանդիսությունների դահլիճներ են կառուցվել, նաեւ' նոր կաթսայատուն:
Դպրոցական մասնաշենքը հիմնանորոգվել է եւ այժմ ունի իր լուսավորության, օդափոխության, հակահրդեհային, տեսահսկման եւ կենտրոնացված զանգի ժամացուցային համակարգեր: Այն նաեւ կահավորվել է, ստացել նոր դպրոցական եւ մարզական գույք, համակարգիչներ: Դպրոցի աշակերտներին, նրանց ծնողներին, ուսուցիչներին շնորհավորելու էր եկել ՀՀ վարչապետ Տիգրան Սարգսյանը' Լոռու մարզպետ Արթուր Նալբանդյանի, ԿԳ նախարար Արմեն Աշոտյանի, Գուգարաց թեմի առաջնորդ տեր Սեպուհ եպիսկոպոս Չուլջյանի, «Լինսի» հիմնադրամի «Դպրոցաշինություն» ԾԻԳ-ի տնօրեն Հրայր Սարգսյանի, Վանաձորի քաղաքապետ Սամվել Դարբինյանի եւ այլ պաշտոնատար անձանց ուղեկցությամբ:
Դպրոցի տնօրեն Դավիթ Մելքոնյանը շնորհավորեց երեխաներին նոր ուսումնական տարվա մեկնարկի կապակցությամբ, միաժամանակ շնորհակալություն հայտնեց հիմնադրամին եւ ՀՀ կառավարությանը' ի դեմ վարչապետի, որ վերջապես իրականություն դարձավ այդ երեխաների երազանքը' սովորել բարենորոգ, տեխնիկապես հագեցված դպրոցում: Տնօրենն իր եւ դպրոցում ուսանողների անունից խոստացավ պահպանել ունեցածը: Շնորհակալության խոսք ասացին նաեւ դպրոցի աշակերտները, շրջանավարտներն ու ծնողները, Լոռու մարզպետը, ով նաեւ հույս հայտնեց, որ երեխաներն այսուհետ առավել ոգեւորված ու լավ կսովորեն, նոր, հարմարավետ պայմաններին համապատասխան, քանի որ, ըստ Ա. Նալբանդյանի, միայն գիտելիքով զինված մարդն է անպարտելի: Իր օրհնության խոսքը ներկաներին ուղղեց Գուգարաց թեմի առաջնորդը:
ՀՀ վարչապետ Տիգրան Սարգսյանը միացավ բոլոր շնորհավորանքներին եւ հնչած բարեմաղթանքներին, գեղեցիկ ցանկություններին: Նշեց, որ դպրոցաշինությունը եղել եւ մնում է կառավարության առաջնահերթություններում. «Ձգտելու ենք անել հնարավորը, որ մեր երեխաներն միշտ նման գեղեցիկ դպրոցներում սովորեն», - ասաց նա: Դպրոցի մուտքը երիզող խորհրդանշական ժապավենը կտրեցին ՀՀ վարչապետն ու Լոռու մարզպետը, որից հետո բոլոր ներկաները հնարավորություն ունեցան շրջել դպրոցում, ծանոթանալ երեխաների համար ստեղծված հարմարավետ պայմաններին: Ինչպես լրագրողներին հայտնեց «Լինսի» հիմնադրամի «Դպրոցաշինություն» ԾԻԳ-ի տնօրեն Հրայր Սարգսյանը, բացի Վանաձորի թիվ 22 դպրոցից, Լոռու մարզում' Ստեփանավանում եւ Սպիտակում (Սպիտակ քաղաքի' թիվ 1, Ստեփանավանի' թիվ 6), եւս երկու դպրոց է բարենորոգվել, եւ նրանք նույնպես առաջիկա օրերին շահագործման կհանձնվեն:
16:47, 31 Օգոստոս, 2011
