Գլխավոր » 2011 » Դեկտեմբեր » 29 » Հարկային տեսուչը 6 ընկերությունների ստիպել է փոխանցել իր որդու ուսման վարձը
11:51
Հարկային տեսուչը 6 ընկերությունների ստիպել է փոխանցել իր որդու ուսման վարձը
Լոռու մարզի դատախազությունում քրեական գործ է հարուցվել ՊԵԿ Վանաձորի տարածքային հարկային տեսչության ավագ հարկային տեսուչի կողմից պաշտոնեական լիազորությունները չարաշահելու դեպքի առթիվ:
Դատախազության մամուլի ծառայությունից NEWS.am-ին հայտնում են, որ ոստիկանության Լոռիի մարզի քննչական բաժնում նախապատրաստված նյութերի համաձայն` Վանաձորի տարածքային հարկային տեսչության հարկային ավագ տեսուչի որդին վճարովի հիմունքներով սովորել է ՀՀ պետական ագրարային համալսարանում: Տեսուչը, օգտագործելով պաշտոնեական դիրքը, Վանաձոր քաղաքում գործող թվով 6 ընկերություններից 2004-2010թթ. ընթացքում պահանջել է, որ փոխանցեն իր որդու ուսման վարձը:
Միաժամանակ` 2005-2008թթ. հաստատապես տեղյակ լինելով այն մասին, որ իր եղբորորդին առանց պետական գրանցման Լոռու մարզի Արջուտ գյուղում զբաղվում է ապօրինի ձեռնարկատիրական գործունեությամբ` միջոցներ չի ձեռնարկել վերջինիս գործունեությունը դադարեցնելու, պատճառված վնասը վերականգնելու ուղղությամբ` էական վնաս պատճառելով պետությանը:
Բացի այդ, վերոհիշյալ հարկային տեսչության ավագ հարկային տեսուչը, իմանալով, որ 2003-2009թթ. Վանաձոր քաղաքի Թումանյան 1 հասցեում գործող «Վակուլիկ» ՍՊ ընկերության տնօրենը` իր մայրը, հիշյալ ՍՊ ընկերության գործունեությունը դադարեցնելու վերաբերյալ կեղծ դիմում-հայտարարություն է տվել եւ դրանից բխող հարկային հաշվետվություններ չի ներկայացրել, ինչպես նաեւ թաքցնելով ընկերությունում աշխատող, բայց չգրանցված աշխատակիցների առկայության հանգամանքը, իր ծառայողական պարտականությունները չի կատարել եւ չի կանխել հարկային օրենսդրությամբ սահմանված պարտավորությունների չկատարելը:
Դեպքի առթիվ հարուցվել է քրեական գործ` ՀՀ քրեական օրենսգրքի 308-րդ հոդվածի 1-ին մասով: Լոռու մարզի դատախազը քրեական գործը զեկուցագրով ներկայացրել է ՀՀ գլխավոր դատախազին` նախաքննության կատարման համար հատուկ քննչական ծառայություն ուղարկելու համար:
Լոռու մարզի դատախազությունում քրեական գործ է հարուցվել ՊԵԿ Վանաձորի տարածքային հարկային տեսչության ավագ հարկային տեսուչի կողմից պաշտոնեական լիազորությունները չարաշահելու դեպքի առթիվ:
