Զատիկը՝ մեր Տէր Յիսուս Քրիստոսի Հրաշափառ Յարութեան օրը, այս տարի Ապրիլի
24ին է, որը համընկնել է Հայոց Ցեղասպանութեան յիշատակման օրուայ հետ:
1915թ. սկսած առաջին անգամն է, որ Ապրիլի 24ը Հայոց Եկեղեցու տօնացոյցով
համընկնել է Զատկի Կիրակիին: Յիրաւի, սա իմաստալից համընկնում է, քանզի
հէնց հայ ազգի եւ ժողովրդի գոյութիւնը Յարութեան ուժի յատուկ խորհրդանիշ է
մահուան աշխարհում: Երբ ամբողջ աշխարհի քրիստոնեաներն այս տարի միեւնոյն
օրն են տօնախմբում Զատիկը, դա մեզ բոլորիս համար պատմական հնարաւորութիւն
պէտք է լինի՝ Հայոց Ցեղասպանութեան անմեղ զոհերի յիշատակին յարգանքի տուրք
մատուցելու համար:
Քանի որ Հայ Առաքելական Եկեղեցին եւ Հայ
ժողովուրդը վկայակոչում են Հայոց Ցեղասպանութեան 96րդ տարելիցը,
Եկեղեցիների Համաշխարհային Խորհուրդը եւ Եւրոպական Եկեղեցիների Կոնֆերանսը
կոչ են անում բոլոր անդամ եկեղեցիներին՝ իրենց աղօթքներում եւ 2011թ.
Զատկական ուղերձներում յիշատակելու Հայոց Ցեղասպանութեան 1.5 միլիոն
զոհերին:
Եկեղեցիների Համաշխարհային Խորհուրդը բարձրացրել է Հայոց
Ցեղասպանութեան միջազգային ճանաչման անհրաժեշտութեան հարցը: 1984 թ. ԵՀԽն
հրապարակել է «Հայաստան. շարունակուող ողբերգութիւն» անունը կրող
փաստաթուղթը, որը նպաստեց հայ ժողովրդի պատմութեան եւ վերապրած
ողբերգութեան ճանաչմանը: Միջազգային հարցերով Եկեղեցիների յանձնախումբը
Հայոց Ցեղասպանութեան հարցը բարձրացրել է ՄԱԿի Մարդու իրաւունքների
յանձնաժողովում՝ յենուելով վերջինիս «Ցեղասպանութիւն ոճրագործութեան
կանխման եւ հատուցման հարցի վերանայուած եւ թարմացուած զեկոյցի» վրայ:
Ինչպէս նշուել է 2005թ. ԵՀԽի Կենտրոնական Կոմիտէի հանդիպման ընթացքում,
ԵՀԽն հաւատացած է, որ «քրիստոնէական տեսանկիւնից դէպի արդարութիւն եւ
համերաշխութիւն տանող ճանապարհը պահանջում է այն յանցանքի ճանաչումը, որն
իրագործուել է, որպէս յիշողութիւնների դարմանման եւ ներման հնարաւորութեան
համար անհերքելի պայման: Ներել նշանակում է ոչ թէ մոռանալ, այլ յետադարձ
հայեացք նետել՝ արդարութիւնը, մարդկային իրաւունքների հանդէպ յարգանքը եւ
ոճրագործների ու զոհերի միջեւ յարաբերութիւնները վերականգնելու նպատակով»:
2005թ.
Ապրիլի 15ին Եւրոպական Եկեղեցիների նախագահութիւնը եւ Եկեղեցիների
Համաշխարհային Խորհուրդը հանդէս եկան համատեղ հրապարակային
յայտարարութեամբ՝ հրաւիրելով բոլոր անդամ Եկեղեցիներին «Ապրիլի 24ը Հայոց
Ցեղասպանութեան յիշատակման օր դարձնելու եւ մտածելու Հայոց Ցեղասպանութեան
90րդ տարելիցի յիշատակմանը վերաբերող յետագայ պատշաճ քայլեր ձեռնարկելու
ուղղութեամբ: ԵԵԿի նախագահութիւնը յետագայում Թուրքիայի կառավարութեանը կոչ
արեց հայ եւ թուրք ազգերի միջեւ հաշտեցման գործընթաց սկսելու, որտեղ մեղքի
գիտակցումն ու ճշմարտութեան հռչակումը անբաժանելի տարրեր պիտի լինեն»: Այս
տարի Զատկի Կիրակիի հանդէպ մեր մօտեցման ոգով՝ ի Յիսուս Քրիստոս մեր բոլոր
հաւատակից եղբայրներին եւ քոյրերին կոչ ենք անում միանալ հայ ժողովրդին՝
հայերի եւ ցեղասպանութեան այլ զոհերի համար աղօթք բարձրացնելով:
Եկէք յիշենք, թէ ինչ ասաց Քրիստոս. «Ես իսկ եմ յարութիւն եւ կեանք.
Ով հաւատում է ինձ, թէպէտ եւ մեռնի, կապրի. եւ ով կենդանի է ու ինձ հաւատում է, յաւիտեան չի մեռնի» (Յովհ. 11:25):
Զատիկը՝ մեր Տէր Յիսուս Քրիստոսի Հրաշափառ Յարութեան օրը, այս տարի Ապրիլի
24ին է, որը համընկնել է Հայոց Ցեղասպանութեան յիշատակման օրուայ հետ:
1915թ. սկսած առաջին անգամն է, որ Ապրիլի 24ը Հայոց Եկեղեցու տօնացոյցով
համընկնել է Զատկի Կիրակիին: Յիրաւի, սա իմաստալից համընկնում է, քանզի
հէնց հայ ազգի եւ ժողովրդի գոյութիւնը Յարութեան ուժի յատուկ խորհրդանիշ է
մահուան աշխարհում: Երբ ամբողջ աշխարհի քրիստոնեաներն այս տարի միեւնոյն
օրն են տօնախմբում Զատիկը, դա մեզ բոլորիս համար պատմական հնարաւորութիւն
պէտք է լինի՝ Հայոց Ցեղասպանութեան անմեղ զոհերի յիշատակին յարգանքի տուրք
մատուցելու համար:
