ՀՀ կառավարությունն այսօր հաստատել է ոչ ընդհանուր օգտագործման
տրանսպորտային միջոցների պարտադիր տեխնիկական զննության անցկացման կարգը: Դրա
համաձայն տարբերակված մոտեցում կցուցաբերվի ընդհանուր օգտագործման
տրանսպորտային միջոցների եւ ոչ ընդհանուր օգտագործման տրանսպորտային
միջոցների տեխնիկական զննության գործընթացի, կտրոնների տրամադրման եւ
հաշվառման սկզբունքներում։ ՀՀ վարչապետ Տիգրան
Սարգսյանն ասել է, որ իրականացրած մոնիտորինգի արդյունքում բացահայտվել են
բազմաթիվ թերություններ, մասնավորապես այն, որ ավտոմեքենաների
տեխզննությունը ձեւական բնույթ է կրում, ավելին, քաղաքացիներն
օրենսդրությամբ չսահմանված վճարումներ են կատարում կամ նույնիսկ
ավտոմեքենաներն ընդհանրապես չեն ներկայացնում տեխզննման։ Նրա
խոսքով, ընդունված որոշումը թույլ է տալիս, որպեսզի շուկան լինի
ինքնակարգավորվող, քաղաքացիներն իրենք ընտրեն տեխզննման այն երեք տասնյակ
կայաններից մեկը, որտեղ կուզենային անցկացնել այդ գործընթացը։ Վարչապետի
հավաստմամբ` հաջորդ քայլը լինելու է տվյալ խնդրի լուծման մեջ
ապահովագրական ընկերությունների ներգրավումը, ինչի շնորհիվ կգործի
փոխվերահսկողության սկզբունքը։
