Անհրաժեշտ է իմանալ

• Տ.մ.-ը տեխնիկապես սարքին վիճակում պահպանելու համար պատասխանատվություն է կրում տրանսպորտային միջոցի սեփականատերը, այն օգտագործողը կամ օգտագործման իրավասություն ունեցող անձը:
• Եթե տուգանքը նշանակելու մասին որոշումը իրավախախտում կատարած անձին հանձնելու օրվանից հետո տասնօրյա ժամկետում անձը դիմում է ոստիկանություն` տուգանքի վճարումը տարաժամկետելու խնդրանքով, ապա վճարումը համարվում է տարաժամկետված` դիմումի մեջ նշված ժամկետով, բայց ոչ ավելի, քան 6 ամիս:

Ուստի, եթե դուք ի վիճակի չեք այդ պահին վճարելու տուգանքը, ապա կարող էք օգտվել այս իրավունքից և Ճանապարհային ոստիկանության համապատասխան բաժին ներկայացնելով գրավոր դիմում` տարաժամկետել տուգանքի վճարումը մինչև 6 ամիս ժամկետով:

Ընդ որում, պետք է նկատի ունենալ, որ Վարչական իրավախախտումների վերաբերյալ ՀՀ օրենսգիրքը խիստ մոտեցում է դրսևորում տուգանքը ժամանակին չվճարողների նկատմամբ` բարձրացնելով նշանակված տուգանքի չափը: Մասնավորապես, տուգանքը նշանակելու մասին որոշումը իրավախախտում կատարած անձին հանձնելու օրվանից, իսկ տուգանքը տարաժամկետելու դիմումում սահմանված ժամկետում կամ տուգանքը նշանակելու վերաբերյալ որոշումը գանգատարկելու կամ բողոքարկելու դեպքում բողոքն առանց բավարարման թողնելուց հետո` 30 օրվա ընթացքում տուգանքը չվճարելու դեպքում տուգանքի չափը եռապատկվում է, իսկ 60 օրվա ընթացքում, տուգանքը չվճարելու դեպքում տուգանքի չափը հնգապատկվում է, որը ենթակա է դատական կարգով բռնագանձման: Տուգանքի գումարի բռնագանձման համար վարույթ իրականացնող մարմինը պարտավոր է 60-օրյա ժամկետը լրանալուց հետո՝ 120 օրվա ընթացքում դիմել դատարան:

Երթեւեկության սահմանված արագության գերազանցման եւ տ.մ.-ների ապակիների լուսաթափանցելիության սահմանված չափի խախտումների համար պատասխանատվություն է առաջանում, երբ տվյալ խախտումը փաստարկված է համապատասխան տեխնիկական միջոցների կիրառմամբ: ՃՊԾ տեսուչները կիրառում են ՚Իսկրա-1ՙ արագաչափ: Պահանջեք ներկայացնել արագաչափի սերտիֆիկատը, ստուգում անցնելու գրառումը և կապարակնիքի առկայությունը: Արգելվում է չափաբանական ստուգում չանցած կամ ժամկետանց ստուգման վկայականով, կամ չսերտիֆիկացված չափիչ միջոցների կիրառումը:

Հիշի՜ր. Վարչական տույժ նշանակելու մասին որոշումը կատարման ենթակա չէ, եթե այն ի կատար չի ածվել կայացման օրվանից հետո` մեկ տարվա ընթացքում:

Տրված վարորդական վկայականների՝ ՚Առանց վարձու աշխատանքի իրավունքիՙ (Բեզ պրավա ռաբօտի պօ նայմու) գրառումները համարվում են ուժը կորցրած:

• Այլ երկրներում ստացած վարորդական վկայականների ՀՀ-ում գործողության ժամկետի սահմանափակում օրենքով նախատեսված չէ: Օտարերկրյա քաղաքացին իր երկրի ազգային և միջազգային վարորդական վկայականով ՀՀ-ում կարող է տրանսպորտային միջոց վարել մինչև իր վարորդական վկայականի վրա նշված ժամկետի ավարտը, իսկ ՀՀ-ում ստացած միջազգային վարորդական վկայականը ՀՀ տարածքում չի գործում:
• Եթե վարորդը չի վիճարկում իրավախախտում կատարելու փաստը, ապա նա իրավունք ունի նշանակվող տուգանքը վճարելու տեղում՝ վարչական իրավախախտման վերաբերյալ արձանագրությունը կազմելուց և որոշումն ընդունելուց հետո։ Տուգանքի վճարման մասին խախտողին տրվում է անդորրագիր: Պահանջեք անդորրագիրը, հակառակ դեպքում` կվճարեք կրկնակին:
• Դուք իրավունք ունեք բողոքարկել, ինչպես պաշտոնատար անձի (տեսուչի) անօրինական գործողությունները, այնպես էլ վարչական մարմնի ընդունած վարչական որոշումը վերադասության կարգով կամ վարչական դատարան:
1. ա) Վերադասության կարգով որոշումը կարող է գանգատարկվել գանգատը քննելու համար իրավազոր մարմինների (պաշտոնատար անձանց) կողմից դրանց ստանալու օրվանից տասնօրյա ժամկետում, եթե օրենսդրությամբ այլ բան չի նախատեսված (ՎԻՎ ՀՀ օրենսգիրք, հոդված 291):

   բ) վարչական ակտն ուժի մեջ մտնելու օրվանից`
   – 6 ամսվա ընթացքում: (ՎՀ և ՎՎՄ ՀՀ օրենք, հոդված 71, 1 մաս, ա) ենթակետ)
   – գրավոր վարչական ակտում բողոքարկման ժամկետը նշված չլինելու դեպքում` մեկ տարվա ընթացքում (ՎՀ և ՎՎՄ ՀՀ օրենք, հոդված 71, 1 մաս):

2. Դատական կարգով`
   – վիճարկվող հայցով` 2 ամիս,
   – ճանաչման հայցով` անկախ ժամանակից,
   – գործողության կատարման հայցով` 1 ամիս/3 ամիս,
   – պարտավորեցման հայցով` մեկամսյա ժամկետում այն պահից, երբ վարչական մարմինը մերժել է գանգատը կամ բողոքը: