Գլխավոր » 2011 » Հունիս » 29 » Վանաձորում գողանում են կայանված մեքենաներն ու թալանում
12:01
Վանաձորում գողանում են կայանված մեքենաներն ու թալանում
Արդեն մեկ շաբաթ է, Վանաձորում խոսում են, թե բակերից մեքենաներ են գողանում, որոնց մի մասը հետո հայտնաբերվում է թալանված: Դրանց մասին բնակչությանը զգոնության զգուշացնում են անգամ տեղական հեռուստաընկերություններով: Թալանված մեքենաների թիվն, ասում են, անցնում է 5-ից: Սակայն Լոռու մարզի քննչական վարչությունից տեղեկացանք միայն երկու դեպքի մասին՝ հունիսի 14-ի լույս 15-ի գիշերը ինքնությունը չպարզված անձը հափշտակել է Վանաձոր քաղաքի բնակիչ Արմեն Արզումանյանին պատկանող 1 մլն դրամ արժողությամբ «Վազ-2107» մակնիշի ավտոմեքենան: Լոռու մարզի քննչական վարչության ավագ քննիչ Վաղինակ Մարտիրոսյանը նշեց, որ դեպքի առթիվ նույն օրը հարուցվել է քրեական գործ ՀՀ քրօր. 137 հոդվածի հատկանիշներով: Իսկ դեպքից շուրջ 5 օր անց` հունիսի 19-ին, վերոհիշյալ ավտոմեքենան հայտնաբերվել է Սպիտակ-Երեւան ավտոմայրուղու 8-րդ կմ-ում գտնվող նախկին «Ծաղկունք» ճաշարանի կիսաքանդ շինության ետեւում: Մեքենայի զննությունից պարզվել է, որ բացակայում են գազի բալոնը, մարտկոցը եւ գազի կարգավորիչը: Նախաքննություն է գնում, նշանակվել են դատամատնադրոշմային եւ դատաապրանքագիտական փորձաքննություններ: Նշված գողությունից մեկ օր անց՝ հունիսի 15-ին, ժամը 12:00-ի սահմաններում կրկին անհայտ անձը գողացել է Վանաձոր քաղաքի Գրիգոր Լուսավորիչ 49 շենքի բակում կայանված «ՍԻ ԸՆԴ ԷՖ ՔՈ» ՍՊ ընկերությանը պատկանող 2 մլն 262 հազար դրամ արժողությամբ «Ֆորդ Տրանզիտ» մակնիշի ավտոմեքենան, որի մեջ եղել են հիշյալ ընկերությանը պատկանող՝ մոտ 300 հազար դրամ արժողությամբ կոսմետիկ պարագաներ: Քննիչ Արթուր Դավթյանը նշեց, որ դեպքի առթիվ նույն օրը հարուցվել է քրեական գործ ՀՀ քրօր. 137 հոդվածի 2-րդ մասի 2-րդ կետի հատկանիշներով (առանձնապես խոշոր չափերի գողություն): Դեպքից մեկ օր անց հիշյալ ավտոմեքենան հայտնաբերվել է Վանաձորի Լանջյան 62 հասցեում գտնվող տան դիմաց: Ի տարբերություն նախորդ դեպքի, այս անգամ գողերը ձեռք չեն տվել ինչպես մեքենային, այնպես էլ կոսմետիկ պարագաներին: Հ.Գ Մեքենաների գողության հերթական դեպքը գրանցվել է երեկ. այժմ մենք փորձում ենք ճշտել դեպքի հանգամանքները. Էդվարդ Արզումանյան
Արդեն մեկ շաբաթ է, Վանաձորում խոսում են, թե բակերից մեքենաներ են գողանում, որոնց մի մասը հետո հայտնաբերվում է թալանված: Դրանց մասին բնակչությանը զգոնության զգուշացնում են անգամ տեղական հեռուստաընկերություններով: Թալանված մեքենաների թիվն, ասում են, անցնում է 5-ից: 
