Փետրվարի 19-ը`Գրքի նվիրատվության օր
ԵՐԵՎԱՆ, 17 ՓԵՏՐՎԱՐԻ, ԱՐՄԵՆՊՐԵՍ:
Արդեն երրորդ տարին է, ինչ Հայաստանի գրողների միությունը փետրվարի 19-ին` Հովհաննես Թումանյանի ծննդյան օրը, հայտարարել է Գիրք նվիրելու օր, իսկ անցյալ տարի այդ նախաձեռնությանը միացավ նաեւ Կրթության եւ գիտության նախարարը:Ինչպես այսօր լրագրողների հետ հանդիպմանն ասաց Հայաստանի Գրողների միության նախագահ Լեւոն Անանյանը` մեր օրերում գիրքը դեռեւս հասարակական հոգեւոր դաշտում պահանջված չէ, նաեւ ընթերցանության ճգնաժամ կա, ուստի այս նախաձեռնության նպատակն է` ուշադրություն սեւեռել մեր երկրի համար կարեւոր ռազմավարական մի խնդրի վրա` դաստիարակել գրագետ սերունդ: ՀԳՄ-ն յուրաքանչյուր ամիս կազմակերպում է հայոց լեզվի եւ գրականության ուսուցիչների հանդիպումներ, մարզերում` «Գրական խաչմերուկ» արշավներ:Վաղը տեղի կունենան գիրք նվիրելու միջոցառումներ, 100-ական գրքեր կառաքվեն մարզեր, տեղի գրական միավորումները գրքերը կտրամադրեն դպրոցներին: Օձունում` Լոռու մարզում, կանցկացվի «Գրական խաչմերուկ» հերթական արշավը, նույն տեղում կբացվի ընթերցասրահը` 200 անուն գրականությամբ: Արդեն 6-րդ տարին է` գրքեր են առաքվում նաեւ Սփյուռք: Լ. Անանյանը նշեց, որ մանկական գրականությանն է մեծ ուշադրություն հատկացվում, քանի որ դա ընթերցասիրության ձեւավորման առումով կարեւոր շրջան է:Ապրիլի 30-ին Հանրային հեռուստատեսությամբ կհեռարձակվի «Ես գրքի բարեկամն եմ» մարաթոնը: «Բարեբախտաբար, ամեն տարի նորանոր առիթներ են ընձեռվում գրքի հետ շփվելու համար: Սա վերջին շրջանի մեր ձեռքբերումներից է»,- ասաց Հայաստանի Հանրապետության մշակույթի նախարարության «Գրքի եւ հրատարակչական գործի կենտրոնի» տնօրենի պաշտոնակատար, բանաստեղծ Էդուարդ Միլիտոնյանը` հավելելով, որ գիրքը միայն ընթերցանություն չէ, այն նաեւ ձեւավորում է մարդու նկարագիրը` գիտելիքից սկսած մինչեւ բարոյականություն: Է. Միլիտոնյանի խոսքով` գրահրատարակության 2011-ի պետական ծրագիրը դեռեւս հաստատված չէ: Սակայն ամեն տարի նախարարությունն այդ նպատակով հատկացնում է 135 մլն դրամ:
2011-02-17
http://armenpress.am
|
