Այն, որ շինարարական աղբի համար Վանաձորի Տարոն 4 թաղամասում կա առանձնացված տարածք, պարտավոր են իմանալ եւ գիտեն քաղաքի բոլոր շինարարական կազմակերպություններն ու անհատները, սակայն հասցնողը աղբը բեռնաթափում է աղբանոցի կողքին կամ թաղամասի բազմաբնակարանների բակերում: Լրատվամիջոցների արձագանքի շնորհիվ խնդրի մասին բնակիչների բազմաթիվ բողոքներին 1 տարի առաջ ականջալուր եղավ նաեւ Վանաձորի քաղաքապետարանի կոմունալ տնտեսության եւ բարեկարգման բաժինը. կարծեք թե մինչ այդ անտեղյակ էր եւ նոր նկատեց աղբի սարերը: Ինչեւէ, 3 օր շարունակ ծանր տեխնիկայի օգնությամբ մաքրվելուց հետո տարածքը վերագտավ իր բնական տեսքը, եւ քաղաքապետարանի կոմունալ բաժինը խոստացավ զգուշացնել կազմակերպություններին, սակայն, ինչպես ցույց տվեց ժամանակը, հետեւողական չեղավ: Այսօր «լեռնագոյացման պրոցեսը» շարունակվում է: Սա էլ քիչ է, շատերն այնքան են լկտիացել, որ ալարում են աղբը հասցնել գոնե մինչեւ Տարոն 4, լցնում են ինչ քանակությամբ ուզում են եւ ուր ուզում են: Այսպիսով արդեն աղբանոցի են վերածվել Վանաձորի գետերն ու փողոցները: Հատկապես Փամբակ գետի շրջակայքում աղբը կուտակված է վաղուց, սակայն կոմունալի, համատիրությունների ու բնակարանային տնտեսության բաժնի պետերը միայն օրերս տեսան դա, այն էլ միայն քաղաքապետի նկատելուց հետո: Նստեցին մեքենան եւ քաղաքը զննեցին: «Ե՛ւ Վարդանլուում կար, եւ Լենինգրադյանի վրա կար, ե՛ւ Եվրոպական համալսարանի դեմը: Զգուշացվել ա թաղամասային հիմնարկներին, որպեսզի աղբը գետի հունից շուտ հանվի»,-ասում է Վանաձորի քաղաքապետարանի կոմունալ տնտեսության եւ բարեկարգման բաժնի պետ Լյովա Մելիքյանը: Որոշ վայրերում էլ կենցաղային աղբի համար տեղադրվելու են աղբամաններ. վերջապես դրանց բացակայությունը եւս նկատվել է: Իսկ թե թաղամասային հիմնարկներն ինչու չեն վերահսկում իրենց ենթակա տարածքները, Մելիքյանի բացատրությունը մեկն է. «Ամեն վայրկյան չեն կարա վերահսկեն` ով լցրեց, տարբեր ժամերի են լցնում: Ասվել ա, ակտավորելու ենք»: Մելիքյանի վերջին արտահայտությունը, չգիտես ինչու, հավատ չի ներշնչում, քանի որ զգուշացնելու արդյունքները չեն երեւում. մարդիկ աղբը շարունակում են լցնել ասիական կենցաղավարության վատ դրսեւորումներից երբեւէ չձերբազատվելու հաստատակամությամբ, իսկ հայտնաբերվածների, առավել եւս տուգանվածների անուններ այսքան ժամանակ ինչ-որ չեն հնչել:
"Ժողովուրդ" թերթի 50 համարի հինգերորդ էջ 
