ՎիվաՍել-ՄՏՍ-ը` «ՄՏՍ» ԲԲԸ դուստր ձեռնարկությունը, և Կիսահաղորդիչների էլեկտրոնային ավտոմատացված նախագծման, ստուգման և արտադրության ոլորտի ծրագրային ապահովման և մտավոր սեփականության համաշխարհային առաջատար Սինոփսիս ընկերությունն այսօր` մարտի 24-ին, կայացած համատեղ մամլո ասուլիսին հայտարարեցին, որ Միկրոէլեկտրոնիկայի հայաստանյան ամենամյա միջազգային վեցերորդ օլիմպիադան կանցկացվի 2011թ. սեպտեմբեր-հոկտեմբեր ամիսներին: Ասուլիսին ներկա էին ՎիվաՍել-ՄՏՍ-ի գլխավոր տնօրեն Ռալֆ Յիրիկյանը և Օլիմպիադայի կազմկոմիտեի նախագահ, Սինոփսիս Արմենիայի գլխավոր գործադիր տնօրեն և Սինոփսիսի կորպորատիվ մարքեթինգի գծով փոխնախագահ Ռիչ Գոլդմանը:

 

Օլիմպիադայի նպատակն է խթանել միկրոէլեկտրոնիկայի զարգացումը Հայաստանում և մասնակից երկրներում, հայտնաբերել երիտասարդ, տաղանդավոր կադրեր, երիտասարդ մասնագետների շրջանում մեծացնել միկրոէլեկտրոնիկայի հանդեպ հետաքրքրությունը, կրթական ծրագրերում անհրաժեշտ ճշգրտումներ կատարելու նպատակով հասկանալ երիտասարդ մասնագետների շրջանում միկրոէլեկտրոնիկայի բնագավառում գիտելիքների մակարդակը և միկրոէլեկտրոնիկայի ոլորտի երիտասարդ մասնագետների համայնք ստեղծել: Օլիմպիադային կարող են մասնակցել մինչև 30 տարեկան ավագ դպրոցների և բարձրագույն ուսումնական հաստատությունների ուսանողներ և միկրոէլեկտրոնիկայի ոլորտի ընկերութունների մասնագետներ:

 

«Իր գոյության վեցերորդ տարում Միկրոէլեկտրոնիկայի միջազգային օլիմպիադան ազդեցիկ ուժ է ձեռք բերել: Երկու տարի առաջ օլիմպիադան միջազգային դառնալու առաջին երերուն քայլերն արեց՝ Ռուսաստանից և Ուկրաինայից ուսանողների մասնակցությամբ: Անցյալ տարի ուսանողներ մասնակցեցին աշխարհի հինգ երկրներից: Այս տարի մենք նախատեսում ենք գրեթե կրկնապատկել այդ թիվը՝ ուսանողներ ներգրավելով երեք մայրցամաքներից, ովքեր Հայաստան կժամանեն Կալիֆորնիայի պես հեռավոր շրջաններից: Մեր հրաշալի գործընկեր ՎիվաՍել-ՄՏՍ-ի առատաձեռն հովանավորության շնորհիվ օլիմպիադային մասնակցելու համար Երևան ժամանելու հրավերքը բավական գրավիչ առաջարկ է դառնում և օլիմպիադան աշխարհում ոլորտի աննախադեպ միջոցառման է վերածում: Օլիմպիադան հնարավորություն է ընձեռում ցույց տալ Հայաստանի զարգացող դերը որպես միկրոէլեկտրոնիկայի տարածաշրջանային կենտրոն և Հայաստանի համար հզոր հիմք է հանդիսանում ողջ աշխարհում արժեքավոր համագործակցություններ ստեղծելու ճանապարհին: Վստահ եմ, որ օլիմպիադայի շրջանակներում ստեղծված համագործակցությունը կփոխհատուցի ի նպաստ Հայաստանի կազմակերպիչների ներդրած ջանքերն  աննախադեպ և չկանխորոշված ձևով: Մենք անհամբեր սպասում ենք հյուրընկալել և մրցել աշխարհի տարբեր երկրներից ժամանած էլեկտրոնիկայի ոլորտի երիտասարդ պայծառ ճարտարագետների հետ հոկտեմբերին, Երևանում, Հայաստանում Սինոփսիսի շաբաթ 2011-ի ընթացքում»,-ասաց Օլիմպիադայի կազմկոմիտեի նախագահ, Սինոփսիս Արմենիայի գլխավոր գործադիր տնօրեն և Սինոփսիսի կորպորատիվ մարքեթինգի գծով փոխնախագահ Ռիչ Գոլդմանը:

Կրթությունը կանխորոշում է երկրի ապագան: Հատկապես երբ այն առանցքային դեր է խաղում երկրի համեմատական առավելությունը խթանելու տեսանկյունից: Առողջ մրցակցությունը ՏՏ ոլորտի ուսանողների միջև անհրաժեշտ պայման է ստեղծագործականության համար. սա մի ոլորտ է, որում հաղթում է ոչ թե ֆիզիկական ուժը, այլ` մտքի փայլը: Այդուհանդերձ, ստեղածագործականությունը դեռ բավարար պայման չէ: Այսօրինակ նախաձեռնություններն պետք է հնարավորինս համակողմանի քաջալերել: Որպես Հայասատանի առաաջատար բջջային օպերատոր և կորպորատիվ քաղաքացի, ՎիվաՍել-ՄՏՍ-ը կարևորում է ցանկացած նախաձեռնություն` ուղղված ստեղծագործականության զարգացմանը: Այստեղ ենք մենք տեսնում մեր առաքելությունը աջակցողի դերում: Զարգանում են այն երկրները, որտեղ գնահատվում է խելացի, տաղանդավոր սերունդը: Հաջողություն ենք մաղթում մրցույթի մասնակիցներին, հատկապես` մեր հայրենակիցներին` վստահ լինելով, որ նրանք իրենց ընձեռած հնարավորությունը կպսակեն հաղթանակով»,-ասաց ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

Այս տարի օլիմպիադային մասնակցության ցանկություն են հայտնել Հայաստանի, Հնդկաստանի, Հորդանանի, Ռուսաստանի, Սերբիայի, Ուկրաինայի, ԱՄՆ-ի և այլ երկրների ներկայացուցիչներ:

Միկրոէլեկտրոնիկայի հայաստանյան ամենամյա միջազգային վեցերորդ օլիմպիադան անցկացվելու է երկու փուլով: Առաջին փուլը` ստուգարքի ձևով, տեղի կունենա 2011թ. սեպտեմբերին` մասնակից բոլոր երկրներում միաժամանակ: Վերջնական փուլում կմրցեն բոլոր երկրների լավագույն մասնակիցները: Այն տեղի կունենա Հայաստանում, հոկտեմբերին, Սինոփսիսի շաբաթը Հայաստանում 2011 միջոցառումների ընթացքում: Մրցույթը կներառի ինքնատիպ լուծումներ պահանջող ճարտարագիտական խնդիրներ:

Օլիմպիադայի թեմաներն են` թվային ինտեգրալ սխեմաների նախագծում և թեստավորում, անալոգային և խառը ազդանշանային ինտեգրալ սխեմաների նախագծում և թեստավորում, կիսահաղորդչային սարքեր և տեխնոլոգիա և ինտեգրալ սխեմաների ավտոմատացված նախագծման մաթեմատիկական և ալգորիթմական ապահովում:

Առաջին կարգի մրցանակը նոութբուք է, երկրորդը` 300,000 դրամ (շուրջ 800 դոլար), երրորդը` 150,000 դրամ (շուրջ 400 դոլար): Նախատեսված են նաև հատուկ մրցանակներ լավագույն ճարտարագիտական լուծման, ամենաստեղծագործական լուծման, ամենայուրօրինակ լուծման և մասնակից յուրաքանչյուր երկրից լավագույն արդյունք ցուցաբերելու համար: Օլիմպիադայի բոլոր մասնակցիները կստանան մասնակցության վկայականներ:

Միկրոէլեկտրոնիկայի հայաստանյան առաջին օլիմպիադան անցկացվել է 2006թ. սեպտեմբերի 22-26-ը: Առաջին փուլին մասնացել է 82 հոգի, որոնցից 32-ն անցել է երկրորդ փուլ: Միկրոէլեկտրոնիկայի հայաստանյան ամենամյա երկրորդ օլիմպիադան անցկացվել է 2007թ. սեպտեմբերի 18-26-ը: Առաջին փուլի 118 մասնակիցներից երկրորդ փուլ է անցել 48-ը: Միկրոէլեկտրոնիկայի հայաստանյան ամենամյա երրորդ օլիմպիադան անցկացվել է 2008թ. սեպտեմբերի 16-25-ը: Առաջին փուլի 115 մասնակցից (որոնցից 15-ը Գյումրիից էր) 32-ը անցավ երկրորդ փուլ: Միկրոէլեկտրոնիկայի հայաստանյան ամենամյա չորրորդ օլիմպիադան անցկացվեց 2009թ. սեպտեմբերի 4-30-ը: Առաջին փուլի 118 մասնակցից (որոնցից 10-ը Ռուսաստանից, 27-ը Ուկրաինայից եւ 11-ը Գյումրիից) 47-ն անցավ երկրորդ փուլ: Միկրոէլեկտրոնիկայի հայաստանյան ամենամյա միջազգային հինգերորդ օլիմպիադան անցկացվել է 2010թ. հոկտեմբերի 4-29-ը: Առաջին փուլի ավելի քան 200 մասնակիցներից 132-ը հայաստանյան բուհերի ուսանողներ էին: Մյուս մասնակիցները ներկայացնում էին Հայաստանից դուրս գտնվող հետևյալ բուհերըª Մոսկվայի էլեկտրոնային տեխնիկայի ինստիտուտ, Սանկտ-Պետերբուրգի էլեկտրատեխնիկական համալսարան, Ինֆորմացիոն տեխնոլոգիաների, մեխանիկայի և օպտիկայի Սանկտ-Պետերբուրգի պետական համալսարան, Խարկովի ռադիոէլեկտրոնիկայի ազգային համալսարան, Հորդանանի գիտության և տեխնոլոգիայի համալսարան, Արքայադուստր Սումայայի տեխնոլոգիական համալսարան, Նիսի համալսարան և Սերբիայի համալսարան: Լավագույն արդյունք ցուցաբերած 50 ուսանող անցավ երկրորդ փուլ:

Հոդվածը՝ www.b24.am-ի