Գլխավոր » 2011 » Փետրվար » 16 » «Ժառանգություն». Չնայած ոստիկանների ահաբեկումներին, Վանաձորի Ազնավուրի հրապարակում մի քանի հարյուր ցուցարարներ են հավաքվել
17:32
«Ժառանգություն». Չնայած ոստիկանների ահաբեկումներին, Վանաձորի Ազնավուրի հրապարակում մի քանի հարյուր ցուցարարներ են հավաքվել
Փետրվար 15, 2011 | 14:16
Չնայած ոստիկանների կողմից ցուցաբերվող խոչընդոտներին ու ահաբեկումներին, Վանաձորի Ազնավուրի հրապարակում մի քանի հարյուր ցուցարարներ են հավաքվել:
Ինչպես NEWS.am-ը տեղեկանում է «Ժառանգություն» կուսակցությունից, Գյումրի-Վանաձոր ճանապարհին գտնվող ԱԺ «Ժառանգության» պատգամավոր Ստեփան Սաֆարյանը տեղեկացրել է, որ ՀՀ ոստիկանության տարածաշրջանային վարչության աշխատակիցները խոչընդոտներ են հարուցում վրացական համարանիշներով մեքենաների վարորդների Վանաձորում նախատեսված ակցիայի իրականացման ուղղությամբ:
Մասնավորապես, Ջաջուռ գյուղի մոտ արգելափակվել է Գյումրիից Վանաձոր ուղեւորվող մի քանի տասնյակ մեքենաների բողոքի ավտոերթը:
Խոչընդոտներ են հարուցվել նաեւ Տաշիրից եւ Ստեփանավանից Վանաձոր ուղեւորված մեքենաների համար: Իսկ Վանաձորում գտնվող ԱԺ «Ժառանգության» պատգամավոր Արմեն Մարտիրոսյանը տեղեկացրել է, որ ի հեճուկս վատ եղանակի (այս պահին այնտեղ ուժեղ ձյուն է տեղում) Ազնավուրի հրապարակում արդեն հավաքվել են 50-ից ավելի մեքենաներ, սակայն ոստիկանները` ոստիկանության տարածաշրջանային վարչության պետի եւ բարձրաստիճան այլ ոստիկանների գլխավորությամբ առանձին-առանձին մոտենում են վարորդներին եւ ահաբեկում նրանց` ստիպելով հեռանալ հրապարակից: Սակայն վարորդները` իրենց մեքենաները հրապարակից հեռացնելուց հետո հետիոտն վերադառնում են Ազնավուրի հրապարակ եւ այս պահին այնտեղ հավաքվել են թվով մինչեւ հարյուր քաղաքացիներ:
Ավելի վաղ NEWS.am-ը նշել էր, որ ոստիկանության այս հակաօրինական եւ հակասահմանադրական գործողությունների վերաբերյալ ԱԺ «Ժառանգության» պատգամավոր Զարուհի Փոստանջյանը տեղեկացրել է ՄԻՊ գրասենյակի աշխատակիցներին, ապա փորձել է կապվել ՀՀ ոստիկանապետ Ալիկ Սարգսյանին, ինչը նրան չի հաջողվել: Ոստիկանապետի փոխարեն նրան պատասխանել է ոստիկանապետի գրասենյակի աշխատակից Պողոսյանը: Պատգամավորը պահանջել է փոխանցել ոստիկանապետին, որ անհապաղ միջոցներ ձեռնարկեն օրինազանց ոստիկաններին կարգի հրավիրելու նպատակով:
«Ժառանգություն» կուսակցությունը խստորեն դատապարտում է ոստիկանության հակասահմանադրական գործելաոճը եւ պահանջում ՀՀ ոստիկանապետ Ալիկ Սարգսյանից անհապաղ միջոցներ ձեռնարկել իր ենթակաների ապօրինի գործողությունները դադարեցնելու ուղղությամբ, ինչպեսեւ վերջիններին պատասխանատվության կանչել:
